திரு அண்ணாமலை உண்ணாமுலை உமையாளொடும்

*1
உண்ணாமுலைஉமையாளொடும் உடன்ஆகிய ஒருவன்,
பெண்ஆகிய பெருமான், மலை---திரு மா மணி திகழ,
மண் ஆர்ந்தன அருவித்திரள் மழலை(ம்) முழவுஅதிரும்---
அண்ணாமலை தொழுவார் வினை வழுவா வணம் அறுமே.

*2
தேமாங்கனி கடுவன் கொள விடு கொம்பொடு தீண்டி,
தூ மா மழை துறுகல்மிசை சிறுநுண்துளி சிதற,
ஆமாம்பிணை அணையும் பொழில் அண்ணாமலை அண்ணல்
பூ மாங் கழல் புனை சேவடி நினைவார் வினை இலரே.

*3
பீலி(ம்)மயில் பெடையோடு உறை பொழில் சூழ் கழை முத்தம்
சூலி(ம்) மணி தரைமேல் நிறை சொரியும் விரி சாரல்,
ஆலி(ம்) மழை தவழும் பொழில் அண்ணாமலை அண்ணல்
காலன் வலி தொலை சேவடி தொழுவாரன புகழே.

*4
உதிரும் மயிர் இடு வெண்தலை கலனா, உலகுஎல்லாம்
எதிரும் பலி உணவுஆகவும், எருது ஏறுவதுஅல்லால்,
முதிரும் சடை இளவெண்பிறை முடிமேல் கொள, அடிமேல்
அதிரும் கழல் அடிகட்கு இடம்---அண்ணாமலைஅதுவே.

*5
மரவம், சிலை, தரளம், மிகு மணி, உந்து வெள்அருவி
அரவம் செய, முரவம் படும் அண்ணாமலை அண்ணல்
உரவம் சடை உலவும் புனல் உடன்ஆவதும் ஓரார்,
குரவம் கமழ் நறுமென்குழல் உமை புல்குதல் குணமே?

*6
பெருகும் புனல் அண்ணாமலை, பிறைசேர், கடல்நஞ்சைப்
பருகும்தனை துணிவார், பொடி அணிவார், அது பருகிக்
கருகும் மிடறு உடையார், கமழ் சடையார், கழல் பரவி
உருகும் மனம் உடையார்தமக்கு உறு நோய் அடையாவே.

*7
கரி காலன, குடர் கொள்வன, கழுது ஆடிய காட்டில்
நரி ஆடிய நகுவெண்தலை உதையுண்டவை உருள,
எரிஆடிய இறைவர்க்கு இடம்---இளவண்டு இசை முரல,
அரி ஆடிய கண்ணாளொடும் அண்ணாமலைஅதுவே.

*8
ஒளிறூ புலிஅதள்ஆடையன், உமை அஞ்சுதல்பொருட்டால்,
பிளிறூ குரல் மதவாரணம் வதனம் பிடித்துஉரித்து,
வெளிறூபட விளையாடிய விகிர்தன்; இராவணனை
அளறூபட அடர்த்தான்; இடம்---அண்ணாமலைஅதுவே.

*9
விளவு ஆர் கனி பட நூறிய கடல்வண்ணனும், வேதக்
கிளர் தாமரைமலர்மேல் உறை கேடு இல் புகழோனும்,
அளவா வணம் அழல் ஆகிய அண்ணாமலை அண்ணல்---
தளராமுலை, முறுவல்(ல்), உமை தலைவன்(ன்)---அடி சரணே!

*10
வேர் வந்துஉற, மாசு ஊர்தர, வெயில் நின்று உழல்வாரும்,
மார்வம் புதை மலி சீவரம் மறையா வருவாரும்,
ஆரம்பர்தம் உரை கொள்ளன்மின்! அண்ணாமலை அண்ணல்,
கூர்வெண்மழுப்படையான், நல கழல் சேர்வது குணமே!

*11
வெம்பு உந்திய கதிசோன் ஒளி விலகும் விரிசாரல்,
அம்பு உந்தி மூஎயில் எய்தவன் அண்ணாமலைஅதனை,
கொம்பு உந்துவ, குயில் ஆலுவ, குளிர் காழியுள் ஞான-
சம்பந்தன் தமிழ் வல்லவர் அடி பேணுதல் தவமே.