சிதம்பரம் ஸ்ரீ நடராஜர் திருக்கோயில்

by **மாலதி** December 31st 2011, 07:55

சிதம்பரம் ஸ்ரீ நடராஜர் திருக்கோயில்

இந்தியாவில் உள்ள பிரசித்தி பற்ற சிவாலயங்களுள், சிதம்பரம் திருக்கோயிலும் ஒன்று. இது, தமிழ்நாட்டில், கடலூர் மாவட்டத்தில், சென்னையிலிருந்து ஏறக்குறைய 189 .கிலோ மீட்டர் தூரத்தில் அமைந்துள்ளது.

சிதம்பரம் கோயிலுக்கு கோவில்,
தில்லை, சித்திரகூடம், புலியூர், பெரும்பாற்றுப் புலியூர், பொதுச்
சிற்றம்பலம், பொன்னம்பலம், புண்டரீகபுரம், தனியூர், வியாக்கிரபுரம், பூலோக
கைலாசம் ஆகிய பல பெயர்கள் உண்டு.

சிதம்பரம் திருக்கோயில் பஞ்சபூதத் தலங்களுள் ஒன்று. பஞ்சபூதத்தலங்களுள், இது ஆகாயத்தலமாகும்.

நமது புராதனமான புராணங்கள் மற்றும் சைவ இலக்கியங்களின்படி, பரமசிவன் தமது திருத்தாண்டவத்தைச் சிதம்பரத்தில் ஆடுகின்றார்.

சிவபெருமான் நடனமாடும் சபை, ' பொன்னம்பலம் ' என்று அழைக்கப்படுகின்றது. இந்த அழகிய மண்டபத்தின் கூரை, இருபத்தோராயிரத்து அறுநூறு தங்க ஓடுகளால் வேயப்பட்டிருக்கின்றது.

சிதம்பரம்
திருத்தலத்தில், நடராஜர் திருக்கோயிலை அடுத்து, சிவகாமிதேவி திருக்கோயில்,
முருகன் கோயில், நாவலிங்கக் கோயில், மகிஷாசுரமர்த்தனி கோயில் முதலிய பல கோயில்கள் அமைந்துள்ளன.

கோயிலின் அருகே, சிவகங்கைத் தீர்த்தம் உள்ளது.
இந்தக் குளத்தில் நாம் பயபக்தியுடன், ஆனந்தமாக நீராடலாம். இந்தப் புனித
தீர்த்தத்தில் உள்ள தண்ணீர் கங்கை நதியைப்போலப் புனிதமானது என்று நூல்கள்
புகழ்கின்றன.

கர்ப்பக்கிரகத்தினுள், மூல விக்கிரகத்துக்கு அருகே, நாம் சிதம்பர ரகசியத்தைத் தரிசிக்கலாம். உருவமில்லாத இறைவன் எங்கும், எதிலும் நிறைந்திருக்கின்றான் என்னும் உயர்ந்த தத்துவத்தைச் சிதம்பர ரகசியம் நமக்கு உணர்த்துகின்றது.

சிதம்பரம் நடராஜப் பெருமானுக்குச் செய்யப்படும் அபிஷேகங்கள்:

ஓர் ஆண்டில் ஆறு நாட்களில், நடராஜப் பெருமானுக்கு அபிஷேகம் செய்யப்படுகின்றது. அந்த நாட்களின் விபரம் :

* சித்திரை மாதத்து திருவோண நட்ச்சத்திரத்தன்று, கனக சபையில் நடராஜருக்கு மாலை வேளையில் அபிஷேகம் நடைபெறும்.

*
ஆனி மாதத்து உத்திர நட்சத்திரத்தன்று , இராசசபை எனப்படும் ஆயிரங்கால்
மண்டபத்துள் இறைவனுக்கு மாலை வேளையில் அபிஷேகம் நடைபெறும்.

* ஆவணி மாதத்து பூர்வபட்ச சதுர்த்தசி தினத்தன்று, கனக சபையில் இறைவனுக்கு மாலை வேளையில் அபிஷேகம் நடைபெறும்.

* புரட்டாசி மாதத்து பூர்வபட்ச சதுர்த்தசி தினத்தன்று, மாலை வேளையில் கனக சபையில் நடராஜருக்கு அபிஷேகம் நடைபெறும்.

*
மார்கழி மாதத்து திருவாதிரை நட்சத்திர தினத்தன்று, இராசசபை
எனப்படும் ஆயிரங்கால் மண்டபத்தில், சூரிய உதயத்துக்கு முன்பாக அபிஷேகம்
நடைபெறும்.

* மாசி மாதத்து பூர்வபட்ச சதுர்த்தசி தினத்தன்று இறைவனுக்கு மாலை வேளையில் கனக சபையில் அபிஷேகம் நடைபெறும்.